"شمس الدين"
إنسان القلب
ونبض العين
حركاته ... وكلامه
غير كل الناس
تشبيكة إيده لما بيسألني ..
(هاقولّك على موضوع
- بابا حبيبي –
أنا عاوز ... مصاصة )
.........................
"شمس الدين" بقى أكبر واحد في الدنيا
وْ ف القلب
تلاقيه بيطرطش ألوانه وبلالينه
، بيعمل نفسه كإن الواد مبسوط
علشان أضحك
بيهزر وقت الجد
ومافيش حد
بيستحمل إنه ... مايبوسهوش
لو شافه
الواد بيهز اكتافه وْبيقلدني
دا حتى بيشخط ف الدنيا
كإنه أب
أب عجوز
فاهم تجاعيد الدنيا كويس
عامل ريس
بيكسّر كل أزايز المواضيع المشروخة
بيحب الجري ، التنطيط
( أنا عاوز ألعب دوخة
عايز اروح عند "احمد" علشان اتنطط)
يا سلام !!!!
يعني يا واد حابسينك
ولا ياواد.....
دا انت بتتنطط في شوارع روحي المقفولة
من ييجي سنين
.....
إقفش
إنت بدأت تقلد "شمس الدين"
التراكيب والنقط المش مفهومة
ليه اتشالت ولاّ اتحطّت ؟
،
إنت ياواد ...
قصدك إنت ؟
(نفسك
يعني)؟
ولاّ بتقصد فعلا "شمس الدين"
*
"شمس الدين"
يا حنين – كان مكبوت – للنور
واتفرفط في السكك الضلمة ونوّرها
على غفلة من هذا الزمن ال ....
على إيه ؟!
الواد داخل ع الأوضة وها ينام
هايبص – كعادته - بتسبيلة
وبسمة نبيلة
ويعمل نفسه بيفهم في الحب
وف النوم والصحيان والعيشة
ويعمل نفسه بيفهم حتى كمان
ف اللعب
*
"شمس الدين"
جنيبا الوقتي
نايم على راحته
على حتة كبيرة من العالم
إللي ماعادشي يساعني
و يساع الفرح اللي بيملى عنيا
وبيصب عليه
.............
"شمس الدين"
نايم بوداعة
كإنه طفل حقيقي
مش قلب .
3.30 ص الأحد 22/11/2004
تعليقات بلوجر
تعليقات فيس بوك