هاعمل ايه..
في تذاكر الأتوبيس
و فْ عقد الفل اللي اشتريتولي
فْ ليلة من على (قصر النيل)
و فْ رنة صوتك ف وداني
أما تقولّي :
(بحبك) و (وحشتيني)
وْ .....
هاعمل إيه ف قصايدك
و فْ لمسة إيدك لما تفكرني بحاجة
واما تشاور على نقطة بعيدة
ف سما أحلامنا
هاعمل إيه ف الليل
إللي بيِطْوَل بيا
وانا قاعدة أدردش وياك
... وحديا
واعمل إيه لما افتكرك
وانت بتضحك
أو لما تسمعني شعر (جاهين)
و(فؤاد حداد)
هاعمل إيه فْ صوت (فيروز)
والدنيا اللي بتوسع لما تكون ويايا
واعمل إيه...
ف الطفل النايم جوايا
، إللي بيضحك لما يشوفك
ويشابي عليك
وبيزعل جدا لما تسلم وتسيبني
هاعمل إيه وانا لسة يادوبك
بادئة أحب المطرا
وشارع (طلعت حرب)
والشاي بالنعناع
وستاير شباك أوضتي
ياااااااه
حَمْل تقيل
هاعمل إيه ف دا كله
لو إنك خلتني أحبك
وسافرت
بحجة إنك ...
هاتجيبلي المهر؟؟؟؟
الخميس 5/2/1998 – 3,30 ص
تعليقات بلوجر
تعليقات فيس بوك