فسحاية قلبي
تشبه باحة مسجد (سيد الشهدا)
وطاقيتي الخضرا .. القبة
دراعي المفرود للسما .. مدنة
قلبي المفتوح بيطلّع (شيخ رفعت)
ولساني المترطب بالذكر
يقول : (الله أكبر)
***
قلمي اتوضا
بمية فضا
الميضة فْ وسط الروح
مبلولة من الضي
واحد جي
وواحد حي
وخي بيلضم إيده فْ خي
قلبي انجلى من بعد ما صدا
وقام اتوضى
***
إطلع من روحي يا وجع الضلع
وخش القلب يا نور الشمع
الزاهد بيقلّب أفكاره
بين الرؤية وبين السَّمْع
***
واحد عدى وكان وما كانش
واحد غيري
قاللي : (سلام)
قاللي كلام
عمر حياته فْ يوم ماتقالش
***
خد نفسك وادعي واستسمح
واتنحنح وادخل
واترحم
هاتلاقي على يمينك دايما
طير أخضر عمال بيسبح
***
عدي على السماوات بجناحك
خدني على الشوق المتاخد
بسماحتك أو قول بسماحك
تلمحني مشدود .. متاخد
طبطب على قلبي وطمني
وبريشك الاخضر خد يدي
لو واحد غيرك كلمني
مش هاسأل غير لما تعدي
يا صديقي الطاير أيا طير
أنا قلبي الحاير بيطير
بس الخوف خلاني أهدّي
عدي على السماوات بجناحك
شيلني
أو .. شاور ع السكة.
6 ص الاثنين 7 سبتمبر 2009
تعليقات بلوجر
تعليقات فيس بوك