(الصورة)
* الهارد اتملى ..... صورك هي الحاجة الوحيدة اللي على
الجهاز ... كتير كتير كتير... أمال انتي ليه واحشاني قوي كدة؟!
* ما هو المشكلة إن الصور ما بتتحضنش ... وانتي وعدتيني
بحضن... وماسبتيليش غير... صور.
* الليلة الأخرانية ... قصدي الوحيدة اللي قضيناها في
حضن البحر ... كل ما اعديها وانا بافر الألبوم ترجع تاني، مع إننا ماقعدناش أكتر
من تلات ساعات ... واللقطة خلصت.
* إنتي متخيلة ان كل ده يحصل؟ إني ارجع شاب تاني واحب
لأول مرة؟ إنك تتهربي مني وتلاقيني كل شوية اطلع لك م التليفون والرسايل؟ إنك
تختفي فجأة.... وكإنك ماكنتيش؟؟؟!!!!
* اليافطة هي هي ... والميدان هو هو، إنتي بس اللي
اتّاخرتي شوية .. فطلعتي برة الكادر!!!
* (الروج) اللي ظهر فجأة في صورتك الأخرانية، وإيده اللي
باينة على وسطك، أكبر دليل على إن اللي سمعته صحيح.
* أنا قابلت امبارح واحدة شبهك ... نفس السمار والطول
والابتسامة والشعر الاسود، نفس كل حاجة، وجيت اندهلها .... نسيت!!!
منتصف ليلة الأربعاء 8 فبراير 2012
تعليقات بلوجر
تعليقات فيس بوك