منقوشة بالحنة

مش مشكلة عنيكي
ولا الكلام في السكوت
مش مشكلة إحنا
المشكلة...
كل البيوت اللي كانت
منقوشة بالحنة
***
هاكتب كلام منعاد

ولا كلام طازة؟
يا بُعْد كل البلاد
يا رسالة في إزازة
مقفول عليكي البحر
يعرج ويتحجج
(الملح مش في الميعاد)
البحر متلجلج
ماعدلهوش عازة
***
أنا هناك في المدى
وانتي هنا في صدري
صوتك مالوهش صدى
صمتي ماهوش عذري
ياللي فردتي الجناح
على حتة من قمري
قمري ماهوش مرتاح
ماشفعلهوش سهري
وباخونّي طول البراح
واكشف عليه سري

***
نشف الكلام في الإيد
طار اليمام م القلب
شق الهوا التنهيد
وانا لسة برضه باحب
باحب في عنيكي
كل الكلام والسكوت
وباحب اقول "احنا"
وباحب اشوف البيوت
منقوشة بالحنة.