الدمع نازل منازل من عنين القلب
والصبر غازل مغازل تشبك الحكايات
عن اللي مات الحي
وعن بيوت الحي .. مايلة ع الجنبين
ياللي بديت الحكاية قول بديتها منين؟
هو انت جاي بحقيقي ولا انت لأ مش جاي؟
عنين، دواير خشب ومشربية شمس
الهمس جوة الكلام وفي الأوض مرمي
وانا اللي لفّت حواري دنيتك قدمي
ساند على ألمي بانقش حنة العواميد
أصل الكلام البعيد بارمي له اوجاعي
وكل دور العبيد يتعروا ويهيصوا
المجد ليا وللجدع اللي كان فاكرني سعيد
أتاريني كنت وحيد
والزحمة كات في القلب
الحزن عامل جدع على قلبي متشطر
ماسك قلم كوبيا وورق أبيض وبيسطر
طب بس لو ييجي برة عزبة المماليك
يلاقيني شايل في قلبي من الأمل غابة
كل الصحابة هنا
كل الصحابة وانا
أمرا على صعاليك
الجاي حي ولو متنا نموت واقفين
اما اللي فات مات ومانعرفش مات ازاي
الأمس جاي م الدفاتر بطلته القادرة
يا بكرة اوعاك في مرة تشبه ملامح أمس
احنا ولاد اللي جاي
نور وفجر وشمس.
وسام الدويك
القاهرة في
3:30 فجر الجمعة 20 مايو 2016