باصلي المغرب الفايت على قلبك
كما الدَّقَّة
وباكل عيشي ويا عيالي
بالدُّقَّة
على أرضك
وطير النورس الإنسان
ما بيطيرشي
ما بيعديش لشط المالح التاني
ولا يسيبك
ولا يحكي لموج سافر بلا شطآن
وطير النورس الإنسان
على كتفه علامة شوق
ف سوق الطير ... مايتباعشي
على قده، ومابيجوعشي
بيحلم تاني باللمة
تدفينا ف عز البرد
بيحلم تاني باللقمة
تكفينا بقد القد
يدوب الملح ف المية
تلاقيني بحنية
وبافتح صدر شباكي على سهوة
بلاقي الصبح يتبسم
وبعد الضهر يتكلم
مع صاحبي على القهوة
ياريتك لسة فاكراني
أنا أصغر ولاد الشط
سافرت زمان مع أهلي
وابويا الصبر علمني ووعاني
رسم لي ف إيدي شبكة وبحر
وكام حاجة ماهيش واضحة
عجوز قاعد
.. وطير بجناح كما المغرب
كبرت يا أمي يا أرضي
وعشت سنين ف أرض الله
ولسة فْ إيدي شبكة ابويا مرسومة
ولسة فْ عقلي باتخيل
يغيب العمر ويليّل
ياريتك لسة فاكراني
أنا أصغر ولاد
ابنك
وراجعلك
ياخدني نهار من الفجرية من إيدي
يوقفني على شطك
أبص بعيني مالقاش حد عارفني
وباتنهد
باحط همومي ف شباكي وبارميها
تلاقيها
يدوب اليوم ما بين إيدي
وبين موجك
واصلّي المغرب الفايت على شطك
كما الدقة ف قلب الحي إنسانك
ياواخدة الكل أحضانك
وقبل الشمس ما تنقّّّر على بابي
بتيجي قوام تصحيني
ويتلموا الولاد تاني
تدق الفسحة أجراسها
ويجروا ويرسموا الحيطة بطباشيرهم
تقول السكة أحلامهم
لأيامهم
وشيخ الجامع الشايب
بدقنه البيضا
بيشوفني ويتبسّم
ولسة الشارع الإنسان ف عمر الجد بيردد:
(مدد...) قولته بتتمدد
ويتكلم
مع المحروسة لما تطل م الشباك
بيستناني بعد العصر في نهايته
وانا مشغول مانش فاضي
وحبات العرق تنزل على صدري
أقوم مسنود
أنا من جابلك الأيام على ضهري
كما المولود
وإيد الضهر تتشبك
ف إيد العصر ويجوني
ماعدش كتير على المغرب
على بحرك
واصلي المغرب الفايت على قلبك
كما الدقة
وباكل عيشي ويا عيالي
بالدقة
على أرضك.
الجمعة 3 مايو 1991
تعليقات بلوجر
تعليقات فيس بوك