للأسف الشديد
اللي حصل في البروفة الجنرال
للثورة
زيها زي كل البروفات الجنرال
مالهوش إعادة
وانت
لإنك مالحقتش م الأول
... متغاظ
لكن معلش ...اطمن
واحجز دورك في الثورة الجاية
وخد بالك من ترتيب الأحداث
وخد وياك (ماسك) ودرع وخوذة
لحسن بيقولوا هايحصل (دم)
قال يعني الثورة الأولانية دهيا
كانت بفتة
دانا كنت باخطي على طراطيف رجلي
براحة وبشويش
واعمل زي بتوع السيرك
والباليرينات
لحسن رجلي تغوص في الدم
ارجع آخر ما ارجع
ألاقيهم حاطين التليفزيون في الشارع
وبيتفرجوا ع اللي بيحصل
فاكرينه بروفة
ماكانوش عارفين
إنه بروفة جنرال ... مابتتعادش
أقولّك ...
أشوفك في الثورة الجاية
ولازم لازم أول ما يقولوا مظاهرة
ماتقولش انك
ياما
سمعت كتير وحضرت كتير
آخرتها بتبقى شوية بتهتف
بتطالب بالتغيير
لأ
دي المسألة جد
هاتحصل ثورة
بس أمانة عليك
وانت بتنزل
شد فيشات التليفزيونات
من هذا العالم
والكنب وكراسي الأنتريهات
ولع فيهم
وان حد من الحزب اياه اتكلم
فكره بالدم.
الجمعة 18 مايو 2012
6 صباحا
تعليقات بلوجر
تعليقات فيس بوك