نفس تشبيكة الإيدين .. هي هي
في "خالد بن الوليد" في اسكندرية
أو في "الغورية"
كإنه مافاتش علينا وقت
كإننا لسة في أول خطوة
بنعلم طريقنا المشي
ونعلم إيدينا ازاي بتحضن بعضها
نفس الكلام وطريقة النطق القديمة
والابتسام
نظرة عنينا هي هي برضه
وحكاية الترام
والمطرا
والبحر
والمشي الكتير
وانعزالنا جوة بعض عن البشر
نفس الحكاية بتبدي في كل يوم وبتستمر
كإننا
لسة بنعرف بعضنا
لسة بنتعلم حروف النطق مش نطق الحروف
نفس إحساسنا القديم إننا مش راح نشوف
غيرنا
أنا مراية حنينك ليّا
وانتي شباكي على الدنيا
وع الأشعار
نفس السلام بالإيد ونفس طعم الحضن
بعد الانتظار
نفس الحاجات المسروقين م الناس
وكإن كل الناس مترصدينا
وكإننا عارفين إنهم مترصدين
كنا – ومازلنا – إحنا ماتغيرناش يا روحي
بنجري ناخد بعض بالأحضان
أينعم
بقينا نحضن الهوا
لكن بنفضل جوا بعض لحين مانتقابل
ولما بنفترق مابنفترقش
والدليل
إننا وبعد ما مرت سنين العمر
مادبلناش ولا قلنا يااااااااااااااااه
كان زمن وكات حاجات هي الحياة
لأ
لسة بنتقابل حتى لو ماشافتش عنينا بعض
انتي ساكناني وانا ساكنك
وعشان كدة
عمر ما بنحتاج مكان
أو زمان
عشان نكون ويا بعض
عارفة ليه؟
أصل تشبيكة الإيدين .. هي هي
في "خالد بن الوليد" في اسكندرية
أو في "الغورية"
كإنه مافاتش علينا وقت
وسام الدويك
القاهرة في
11:20 م السبت 27 ديسمبر 2014
تعليقات بلوجر
تعليقات فيس بوك