(1)
وِشّ
وما بيننا يا بنت
الناس مولود
مرسوم على صفحة
من كشكول
مرسوم على حيطة
بالطباشير
لكن ليه..
لما بنيجي نشيله
- عشان نلاغيه –
الوش بيبهت
وملامحه تزول؟
**************
(2)
رقصة
أرفض ترقص فوق
الحبل فْ يوم
أرفض رشوة فْ نص
رغيف
حدفتها البوم
واما يغنوا
كلامهم هما
سيب (الكورَسْ)
كله ... وقوم.
***********
(3)
كلمة
مكتوب على صدفة
فْ صدرك متدلّيّة
أنا كنت حصان
رهوان
مكسور أوزان
الشعر فْ حلْقه
لكن هايقول
بيدق بيبان
العالم كله بْحافْره
علشان هايقول
ويهز الجرس الفوق
الراس
علشان ... هايقول
إنما لما الجرس
الميت
يخبط ف لْجام
مقفول
ينسى كلام العالم
كله.
وسام الدويك
(ديسمبر 1991)
تعليقات بلوجر
تعليقات فيس بوك