قواعد التعامل مع الفيسبوك اللي مش مهم عددهم!!!

فعلا مش مهم عددهم لإن أكتر حاجة بقى عايظاني هي الأعداد دي من ساعة رواية قواعد العشق والدنيا اتقلبت بوستات قواعد أربعين وتلاتين، لأ وكله كوم وأرقام مواضيع المواقع والصحف كوم تاني، 102 معلومة مانتاش عارفها عن اسمه ايه، 42 سبب يخلوا فلان يروحوا فين، سبعة وستين فكرة لو فكرت فيهم هاتطق تموت، تلاتة وتمانين سر كانوا مخبيينهم عن نابليون واحنا اللي هانقولهم لكم، اييييييييييييييييييييييه؟؟

عموما دي قواعدي انا، خدت مني مش عارف كام وقت كدة

 الأولى : كل القواعد اللي هاكتبها دي بالزم بيها نفسي وبس يعني مش ملزمة لحد تاني

 الثانية : لما تيجي تدخل ع الفيسبوك تسلم .. تتنحنح .. كدة يعني واما تيجي ماشي تعمل باي باي حتى

 الثالثة : مش كل اللي بيحصل لك ممكن يتنشر ع الفيسبوك .. آه وربنا

 الرابعة : مش كل البوستات بتاعة الناس للمناقشة .. ممكن تعليق بسيط .. لكن المناقشة                    تبقى أفضل وش لوش، ليه؟ عشان فيه جملة بتتكتب ليها مية نطق                    وكل نطق وله معنى، فالناس بتخسر بعض

 الخامسة : وحياة ربنا احنا كلنا بقينا نفهم سياسة وبالتأكيد كل الاتجاهات موجودة فانت اختار بقى، تقفل على نفسك باصحاب في اتجاهك وبس، أو تنفتح ع الكل وتقبل ده، لكن ماتقعدش كل شوية بقى : (كل خرفان فلان تطلع برة بييييييييييييييتي، كل معيز علااااااااااااااااااان ماشفهمش في الأنتريييييييييييييييه) الرحمة يعني

 السادسة : طول ما احنا بنأكد على البديهيات عمرنا ما هانفلح، ياخوانا الناس كل يوم تطلع من بلكونات الفيسبوك وتصوت : (ده الأكاونت بتاعي وانا حر فيييييييييييييييه، واللي مش عاجبه كلامي يعمل لي بلوك، ما حدش يقولي اكتب ايه وماكتبش ايه)   طبعا .. ده ألف به، فارحموا الناس وارحموني انا شخصيا لإني باشوف البوست ده يوميا من تلاتة اربعة ع الأقل .. مافيش في الدنيا كدة !!!!!!!!!!!!!

 السابعة : حكاية التهديد اليومي بتاعة : (وديني اللي مش هايتفاعل معايا لابلكه) دي مش تمام على فكرة ومش طبيعية، هو انا لازم اعلق عندك عشان اثبت اني فريند؟ ايه؟ بامضي حضور يعني؟ انا ممكن اكون متابعك بس علاقتنا في الواقع ماتسمحش ان كل ما تعمل حاجة اعمل لايك او اكتب كومنت .. عادي يعني دانا ممكن اكون ماليش نفس او ماضمنش رد فعلك لو هزرت مثلا، او داخل اكتب ولا اشير واقلب الصفحات يعني...

الثامنة : الجماعة بقى اللي لابدين لنا في الدرة دول، هاه ؟ فيه ايه؟ تلاقي الواحد ولا الواحدة من دول يدخل ويقعد ييجي ست ساعات كإنه بيتجسس علينا من ورا شباكه مثلا؟ الله !!! فيه ايه ياخوانا؟ طب اتنحنح .. نقري ع الباب بضوافرك، اشجينا بشير لأغنية، ولا صورة عيل صغنن كيوت، ولا حاجة؟ ولا حاجة خاااااالص؟ وفجأة هوووووووب تلاقيه داخل لك انبوكس، انت لسة داخل ولا ايه؟ لأ انا بقالي ربع قرن بس عايزك في حاجة !!!!!!!!!!!!!!

التاسعة : الفريندس اللي بالآلاف ولا الميات دول مش اصدقاء حقيقيين، اه والله اه وربنا آه بأمانة آه صدقني، الكلمة مخادعة جدا، لإن الصديق ده شخص قريب قوي، واللي عندك مش كلهم قريبين انت ماتعرفش منهم غير الواد حمادة بتاع اولى تجارة، وانتي ماتعرفيش غير داليا اللي اشتغلتوا سوا في كول سنتر من اربع سنين، مش هانضحك على بعض، ومش هانخللي مارك يضحك علينا، لإن الصديق ببساطة هو مستودع الأسرار، وماينفعش ابدااااااااااا اني اقبل واحد او واحدة على الأكاونت وكدة بقى مؤتمن واقول بقى وابعبع، لأ .. شوية خصوصية يرحمكم الله

العاشرة : الإبداع اللي ببيكتبوه الأصدقاء او بيشيروه زي الشعر والقصة واللوحة والصورة، مش مكانه ابدا المناقشة النقدية والتحليل الموضوعي، بكتيره لايك او حلوة او جميلة ولما تتقابلوا في ندوة ولا معرض اتناقشوا بموضوعية، الفيسبوك مش حمل النقاد لكن ممكن يكون مكان راااائع جدا نشوف فيه ابداعات بعض

الحداشر : اكتر الناس على الفيسبوك بتشير وبتقول حاجات عكس شخصيتها تماما واتفضحوا جدا وكشفناهم خلاص، فبلاش تبقى ساذج وكل ما تلاقي حد كاتب كلمتين يا اما تقول له اطلع من دول، يا اما تقوله ما اعظم كلماتك!!!!

الاتناشر : البلوك مش معناه الوحيد اني باستبعدك من حياتي لإن الفيسبوك مش الحياة على فكرة، ممكن يكون عشان ماتحصلش مشاكل لإن النفوس مش زي بعض، ممكن يكون عشان اختلاف في الآراء أو بنوتة مش عايزة مراقبة او شاب مش عايز تجسس من العيلة، او من الدكاترة او المدرسين او رئيسه في العمل، كتير عاملين بلوك لأزواجهم على فكرة .. عادي يعني مش شتيمة ولا باطردك من بيتي مثلا!!!

التلاتاشر : مش فاكر بقى، لكن لو عند كل واحد من حضراتكم قواعد يلزم بيها نفسه وبس ومايفرضهاش على حد، ياريت تكتبوها في تعليقات يمكن نطلع بمنهج متكامل يخلينا نقدر نتعامل بشكل اريح على الفيسبوك

شاركه على جوجل بلس

عن الكاتب وسام الدويك