أنا مافهمش في الحواديت
لا انا صايع ولا صعلوك
ولا مالك ولا مملوك
ولا حبيت
ولا شايل على كفي
قلوب بتحب وتدفّي
ولا مكفّي
كلام الليل بسيحانه
وفجر يرش ألحانه
وواحد صاحبي متّاخد
وانا مبهور
ولا بافتح طاقات النور
ولا حاجة
أنا اللي إديّا رجراجة
وبتدلدق صواني الود
أبو الخطوة اللي طالعة تمد
أبو الضحكة اللي يتشعبط في جلابيتها
عيال بالزوفة أو بالكوم
واقولك إيه؟
أنا المحروم
أنا اللي يلومني مايلومنيش
وانا اللي يشوفني يوم عايش
مايسألنيش
باعيش ازاي؟
أنا اللي جاي
وجاي لكم
بامد الشوف
15 مارس 2005
تعليقات بلوجر
تعليقات فيس بوك