ما دمت هاتعلق أقنعتك وحكايات الماضي
على
الشماعة اللي ورا الباب
يبقى ضروري تتأكد م المسامير
ماهو مش كل ماهتعلق حزن يقع
ضحكة تقع
حدوتة حب قديمة تقع
وتقول العيب في الحيطة
المفروض تتاكد من حيطان البيت
والمسامير ... ماتكونش مصدية
اصل اللي بيتعلق فيها كتيييير
والجاي اكتر
***
صيف آينعم والصهد ماليني
لكن فيه حتة صغيرة قد الكف
شكلها يدي على ربيع ..
بتبص من الحيطة الفاضية
على كل اللبلاب اللي فْ شِعري
،
بتوسَع في مساحة الاوضة
لاجل نركب مسامير أكتر
تستحمل
كل الأحزان الجاية
***
حيطان البيت دلوقتي بقت مليانة
ضحكة هنا ..همسة هناك
زعلة وراحت متعلقة ع الشباك
طب فين هاتعلق آخر جملة في قصة حبك :
"مش
قادرة أكمل وياك"
يووووه ...علقها جنب اخواتها هناك
وسام الدويك
القاهرة في 12
يونيو 2016
4:30 عصرا
تعليقات بلوجر
تعليقات فيس بوك